Sjónvarpsþátturinn femin.is var tengdur samnefndum vefmiðli og tók mið af honum. Þátturinn var sérsniðinn að konum og við hugmyndavinnuna var mikið hugsað út í hvað höfðar til kvenna. “Konur vilja vera með lappir upp í sófa að tala saman í ró og næði, hafa fallegt í kringum sig og eitthvað til að narta í” – var eitt af því sem kom fram á hugmyndafundi og var það notað sem innblástur varðandi umgjörðina.
Í hverjum þætti var skipt um um þemalit – og blóm, hlutir, púðar og klæðnaður valið í stíl. Viðtölin fengu óvenju langan tíma og voru með rólegu yfirbragði. Húsgögnin voru þægileg; grjónapúðar, stórir púðar til að sitja á gólfi og bekkir með púðum. Það var miðað við að fólk gæti verið eins og heima hjá sér, en ekki setið í stífum stellingum. Gestum var boðið að vera á sokkaleistunum eða berfætt og jafnvel boðið upp á fótabað.
Innihald sjónvarpsþáttarins tók mið af vefsíðunni og þeim flokkum sem þar voru: Starfsferill, matur, heilsa, kynlíf, samskipti kynjanna og barnauppeldi. Stjórnarskrá þáttarins var að hann væri skemmtilegur innblástur fyrir lífið, jákvæður og lausnamiðaður þáttur.